DIE LIEWE OU TANTRUMS!!!

Wat is die moelikste"beroep" wat baie hoë eise aan jou stel? Sonder vakansie of geldbonus? Jy ontvang geen werksomskrywing nie, en ontvang ook nie 'n handleiding nie? 

OUERSKAP!!!

Sjoe, wens ons as ouers nie soms ons het Salomo se wysheid nie!
Ouerskap is 'n 27/7 "beroep". So lief as wat ons vir ons kinders is,is ons steeds net mense wat foute kan maak en moeg kan word. Ons is dus nie volmaak nie. Soms gaan dit so rof in die huis tussen dag tot dag takies, werk en kinders dat ons brein so besig is om te dink wat kom volgende dat ons nie mooi fokus op wat ons doen nie en dan beland die sleutel in die yskas en jy vergeet om jou selfoon hoog te sit, net om dit in stukke te kry omdat baba dit gegooi het.

Om 'n ouer te wees is regtig harde werk, maar dis lekker en 'n voorreg. Een van die groot monsters waar ons as ouers teen moet veg is die bekende TANTRUMS (soos wat dit meer bekend is). Een of ander dag tref dit elke gesin.

'n Seuntjie van 4jaar het eendag toe sy klein sussie huil sy ma geroep en gesê "mamma,sussie gooi alweer 'n pamper!"  He he, so tussen doeke en tantrums het hy bietjie deurmekaar geraak.

ONS GESELS BIETJIE OOR HIERDIE WOEDE BUIE:

Kinders toets grense - hulle is meesters daarin! Hulle weet presies hoe om ons as ouers te speel en te manipuleer om hulle sin te kry. Om in te moet gee ter wille van vrede, is om indirek vir jou kind te sê "tantrum, dan kry jy jou sin!". Die beste is om sover moontlik daardie "uitbarsting" te probeer vermy. Roetine is belangrik, dinge soos bad, eet, slaap ens op dieselfde tyd sodat die kind later presies sal weet wat volg na wat. Indien jou kleuter lekker speel en jy weet dis amper tyd om te bad, gaan na hom en vertel hom dat hy nog net 'n rukkie se speel oor het dis amper tyd vir bad.

Moenie die winkels aandurf met 'n honger of moeg kleuter nie. Indien kleuter by is wanneer inkopies gedoen word, betrek hom deur te gesels en laat hom ook keuses maak (beperk) met iets soos "moet ons die pienk of die blou seep koop?" Wanneer jy iets van die rak afhaal gee van dit vir die kleuter om in die trollie te laai. Sodra die speelgoed amper in sig is, loop vinnig verby terwyl jy wys na die ander kant en bv sê "ek wonder of die suiker op daardie rak sal wees?"

Prys en gee lof vir goeie gedrag. 'n Beloningskaart werk gewoonlik goed vir goeie gedrag.

Die kleuter moet leer hy/sy kry genoeg liefde, aandag en empatie en hoef dus nie aandag te soek op 'n "tantrum" manier nie. Wanneer jy dan met die kleuter raas fokus jy net op hom en is dit aandag vir hom, daarom doen hul dit graag. Negatiewe aandag is vir hulle beter as geen aandag. Kleuters moet geleidelik leer aanvaar dat sy ouers nie uitsluitlik daar is om net aan hom aandag te gee nie. Daar moet wel tye uitgesonder word wanneer hy wel op sy ouers se volle aandag aanspraak kan maak.

HY/SY IS NET STOUT (?)

Die kind word soms as stout gesien oor sy optrede. Sou ons bietjie "dieper" na sy stoute optrede gaan kyk kan die optrede eintlik dalk wees omdat die kind verveeld is, bietjie afgeskeep voel, selfs jaloers voel, moeg of honger is. Ek glo nogal aan die bekende woorde " 'n verveelde kind is 'n "stoute" kind.

Wanneer hulle moeg of honger is volg gewoonlik 'n "tantrum".

Na middagete kan hul bloedsuiker dalk later die middag val. Iets soos kaas, koue vleis, yogurt of peanut butter brood is 'n goeie idee vir 'n happie tussen middag en aandete. Koekies en lekkers in daardie tyd kan hul aandete beinvloed omdat dit hoog in suiker is. Dit kan weer lei dat die kleuter sleg slaap omdat hy nie goed geeet het nie en dan kan hy more weer moeg opstaan wat later deur die dag weereens na tantrums kan lei.

Wanneer die kind tantum is dit altyd 'n goeie idee om aandag te probeer aftrek met iets anders. Dit is baie belangrik dat jou kind sal weet daardie optrede is onaanvaarbaar. Hulle moet altyd weet wanneer jy nee sê bedoel jy dit. Jy gaan nie ingee nie. Jou kind sal begin leer dat jy ernstig is daaroor as jy elke keer wanneer jy nee gesê het en jou kind hou steeds aan, dadelik optree deur die kind weg te vat, selfs al skop skree en huil hy. Jy moet vir die kind altyd laat weet dat daardie optrede onaanvaarbaar is.

Kom gesels saam oor tantrums en deel asseblief julle idees en raad met ons.